Are you still using old vehicles.. If you do this, Rs. 50 thousand discount..
మీరు ఇంకా పాత వాహనాలను వాడుతున్నారా.. ఇలా చేస్తే రూ.50 వేలు రాయితీ..
హైదరాబాద్‌లో కాలం చెల్లిన 24.40 లక్షల వాహనాలను తుక్కుగా మార్చే ప్రక్రియను ప్రభుత్వం ప్రారంభించింది. వ్యక్తిగత వాహనాలు 15 ఏళ్లు, వాణిజ్య వాహనాలు 8 ఏళ్లు దాటితే వాటిని తుక్కుగా పరిగణిస్తారు. పాత వాహనాలను తుక్కుగా మార్చి కొత్త వాహనం కొనుగోలు చేస్తే పన్ను రాయితీ లభిస్తుంది. ద్విచక్ర వాహనాలకు రూ. 1000 నుండి రూ. 5000 వరకు .. నాలుగు చక్రాల వాహనాలకు రూ. 10,000 నుండి రూ. 50,000 వరకు రాయితీ ఉంటుంది.
ప్రకృతి నియమం ఇది.. పుట్టిన ప్రతిదీ ఒకరోజు కాలం చెల్లాల్సిందే. మనిషైనా, వస్తువైనా.. సమయం తీరితే అంతం తప్పదు. ముఖ్యంగా వాహనాల విషయంలో ఈ నియమం మరింత ముఖ్యం. కాలం చెల్లిన వాహనాలను ఇంకా ఉపయోగిస్తూ ఉండటం పర్యావరణానికి పెను ప్రమాదం కలిగిస్తోంది. అవి విడుదల చేసే కాలుష్య వాయువులు భూమిని వేడెక్కిస్తున్నాయి. వివిధ రకాల వ్యాధులకు కారణం అవుతున్నాయి. అంతేకాకుండా.. పాత ఇంజన్లు కావడంతో అవి ఎక్కువ ఇంధనాన్ని కూడా వినియోగిస్తాయి.
కొత్త వాహనాల కొనుగోళ్లపై రాయితీ..
హైదరాబాద్ మహానగరంలో వాహనాల సంఖ్య రాకెట్ వేగంతో పెరుగుతోంది. ప్రజల అవసరాలు పెరిగే కొద్దీ రోడ్ల మీద వాహనాల రద్దీ కూడా పెరుగుతోంది. అధికారిక లెక్కల ప్రకారం.. గ్రేటర్ హైదరాబాద్‌లో ఈ ఏడాది జనవరి నాటికి ఏకంగా 84 లక్షల వాహనాలు ఉన్నాయి. వీటిలో దాదాపు 24.40 లక్షల వాహనాలు కాలం చెల్లినవిగా గుర్తించారు. ఈ పాత వాహనాలను తుక్కుగా మార్చేందుకు రాష్ట్ర ప్రభుత్వం ఒక మంచి కార్యక్రమాన్ని ప్రారంభించింది.
ఇటీవల జీడిమెట్ల దగ్గర పాశమైలారంలో ఒక ప్రత్యేక ప్లాంటుకు అనుమతి కూడా ఇచ్చింది. వ్యక్తిగత అవసరాల కోసం కొనుగోలు చేసిన వాహనాలు వాటి రిజిస్ట్రేషన్ తేదీ నుండి 15 ఏళ్లు పూర్తి చేసుకుంటే.. అలాగే వాణిజ్య అవసరాల కోసం ఉపయోగించే వాహనాలు 8 ఏళ్లు దాటితే వాటిని కాలం చెల్లినవిగా పరిగణిస్తారు. అయితే.. ఒకవేళ వాహన యజమాని తన పాత వాహనాన్ని తుక్కుగా మార్చి.. అదే తరహాకు చెందిన కొత్త వాహనాన్ని కొనుగోలు చేస్తే... అతనికి జీవితకాల పన్నులో కొంత మొత్తాన్ని రాయితీగా అందిస్తారు. అయితే వీటిలో ఫిట్నెస్ బాగున్న వెహికల్స్‌కు ఐదేళ్ల పాటు మినహాయింపు ఉంటుంది. వెహికల్‌ ఫిట్నెస్ పరీక్షలో పాసయితే.. రూ. 5 వేలు గ్రీన్‌ ట్యాక్స్ చెల్లించి ఐదేళ్లు నడుపుకోవచ్చు. ఆ తర్వాత కూడా ఫిట్‌గా ఉంటే.. మరో రూ.10 వేలు చెల్లించి మరో ఐదేళ్లు నడుపుకోవచ్చు. అంటే గ్రీన్‌ ట్యాక్స్ చెల్లిస్తే వెహికల్స్ నడుపుకోవచ్చు.
ఒక వాహనం నిజంగా పనికిరాదని రవాణా శాఖ ఇన్‌స్పెక్టర్లు నిర్ధారిస్తే.. దానిని తప్పనిసరిగా తుక్కుకు పంపాల్సి ఉంటుంది. దీని కోసం వాహన యజమాని రవాణా శాఖ కార్యాలయంలో దరఖాస్తు చేసుకోవాలి. తన ఒరిజినల్ ఆర్సీ (రిజిస్ట్రేషన్ సర్టిఫికేట్)ని దరఖాస్తుకు జత చేయాలి. ఈ ప్రక్రియ పూర్తయిన తర్వాత.. రవాణా శాఖ వాహనదారుడికి రిజిస్ట్రేషన్ రద్దు చేసినట్లు ఒక ధ్రువపత్రాన్ని ఇస్తుంది.
ఈ ధ్రువపత్రం పొందిన తర్వాత.. వాహన యజమాని ఆ పత్రాన్ని తీసుకుని రవాణా శాఖచే అనుమతి పొందిన తుక్కు కేంద్రాన్ని సంప్రదించాలి. తుక్కు కేంద్రంలోని వారు వాహనం వివరాలను పరిశీలించి.. తుక్కు చేసే ప్రక్రియను ప్రారంభిస్తారు. ఆ తర్వాత.. స్క్రాప్ చేసిన వాహనం వివరాలను ఆన్‌లైన్‌లో నమోదు చేస్తారు. తుక్కు చేసిన వ్యక్తికి, తుక్కు కేంద్రం పేరు, వాహనం రకం, నంబరు, తుక్కు చేసిన తేదీ వంటి వివరాలతో ఒక నిర్ధారణ పత్రాన్ని ఇస్తారు. ఈ ధ్రువపత్రం ఉన్నవారు కొత్త వాహనం కొనుగోలు చేస్తే.. వాణిజ్య వాహనాలకు రెండేళ్ల వరకు మరియు వ్యక్తిగత వాహనాలకు ఏడాది కాలపరిమితిలో పన్ను రాయితీ లభిస్తుంది.
వీటిలో.. వ్యక్తిగత అవసరాల కోసం ఉపయోగించే ద్విచక్ర వాహనం ధర లక్ష రూపాయల లోపు ఉంటే రూ. 1000 రాయితీ ఇస్తారు. లక్ష నుండి రెండు లక్షల మధ్య ఉంటే రూ. 2000, రెండు నుండి మూడు లక్షల మధ్య ఉంటే రూ. 3000, మూడు నుండి నాలుగు లక్షల మధ్య ఉంటే రూ. 4000 మరియు నాలుగు నుండి ఐదు లక్షల మధ్య ఉంటే రూ. 5000 రాయితీ లభిస్తుంది.
ఇక నాలుగు చక్రాల వాహనాల విషయానికి వస్తే.. ఐదు లక్షల లోపు ధర కలిగిన వాహనానికి రూ. 10,000 రాయితీ ఇస్తారు. వాహనం ధర ఐదు లక్షల నుండి పది లక్షల మధ్య ఉంటే రూ. 20,000 మరియు ఇరవై లక్షల కంటే ఎక్కువ ఖరీదు గల వాహనానికి ఏకంగా రూ. 50,000 రాయితీ లభిస్తుంది. ఈ రాయితీలు ప్రజలను తమ పాత వాహనాలను తుక్కుగా మార్చి... కొత్త పర్యావరణ అనుకూల వాహనాలను కొనుగోలు చేయడానికి ప్రోత్సహిస్తాయి. ఇది కాలుష్యాన్ని తగ్గించడంలో.. ఇంధన ఆదా చేయడంలో సహాయపడుతుంది.