Women cheated by Fake Currency Notes
నమ్మించి గొంతు కోయడమంటే ఇదేనేమో.. ఎంత పని చేసింది ‘కరెన్సీ నోటు’..
‘‘డబ్బు డబ్బు, నువ్వు ఏం చేస్తావు?’’ అని అడిగితే, ‘మంచిగా ఉన్న బంధాల మధ్య చిచ్చు పెడతాను, ఆత్మీయ మిత్రులను విడగొడతాను, అన్యోన్యంగా ఉన్న దంపతుల మధ్య దూరాన్ని పెంచుతాను’ అని బదులిచ్చిందట. ఈ మాటలు అక్షర సత్యాలని నిరూపిస్తూ.. సమాజంలో నిత్యం ఎన్నో సంఘటనలు జరుగుతున్నాయి. మానవ సంబంధాలన్నీ ఆర్థిక సంబంధాలే అని ఓ ప్రముఖ ఆర్థికవేత్త వ్యాఖ్యానించినట్లుగానే.. నేటి ప్రపంచంలో ధనమే ప్రధాన భూమిక పోషిస్తోంది. ఒకప్పుడు నమ్మకానికి ప్రతీకగా నిలిచిన అప్పు వ్యవహారాలు, ఇప్పుడు ప్రాణాల మీదకు తెచ్చే పరిస్థితికి దిగజారాయి. అప్పు ఇచ్చేవారు భయపడే దుస్థితికి వచ్చింది. తీసుకునేటప్పుడు వినయంగా ఉన్నవారు తిరిగి చెల్లించేటప్పుడు మనమే అప్పు అడుగుతున్నామా అన్నట్లుగా ప్రవర్తించడం సర్వసాధారణమైపోయింది. తాజాగా హైదరాబాద్‌లో వెలుగు చూసిన ఒక దారుణ సంఘటన ఈ కోవలోకే వస్తుంది.
అప్పటివరకు వ్యాపారంలో ఎంతో సఖ్యతతో ఉన్న భాగస్వాముల మధ్య, ఈ ‘నోటు’ చిచ్చు పెట్టింది. అత్యవసరంగా డబ్బులు కావాలని అడగడంతో.. తోటి భాగస్వామే కదా అని నమ్మి అప్పు ఇచ్చినందుకు, ప్రాణాలు కోల్పోయే పరిస్థితికి చేరుకుంది ఒక మహిళ. బెంగళూరుకు చెందిన మనీషా సావంత్‌, తన తండ్రి స్నేహితుడైన రామ్‌పటేల్‌తో వ్యాపార లావాదేవీలు నిర్వహిస్తుండేది. ఈ నమ్మకాన్ని ఆసరాగా చేసుకుని, రామ్‌పటేల్‌ ఒక మోసపూరిత పథకాన్ని పన్నాడు. తనకు రూ.18.5 లక్షలు అత్యవసరంగా బ్యాంకులో జమ చేయాల్సి ఉందని.. ఆ మొత్తాన్ని పంపిస్తే వెంటనే తిరిగి ఇచ్చేస్తానని నమ్మబలికాడు. రామ్‌పటేల్‌ మాటలు నమ్మిన మనీషా.. ఈ నెల 17న అతడి ఖాతాకు ఆ మొత్తాన్ని బదిలీ చేసింది.
కొద్ది రోజుల తర్వాత.. మనీషా తన డబ్బును తిరిగి అడగగా.. రామ్‌పటేల్‌ ఆదాయ పన్ను శాఖ అధికారులతో ఇబ్బందులు ఉన్నాయని.. నగదు రూపంలో ఇస్తానని చెప్పి ఆమెను నమ్మించాడు. ఆమెకు నగదుతో కూడిన ఒక బ్యాగును అప్పగించాడు. మనీషా ఆ బ్యాగును తెరిచి చూడగా.. అందులో చిన్నపిల్లలు ఆడుకునే నకిలీ నోట్లు ఉండటంతో ఆమె దిగ్భ్రాంతికి గురైంది. ఇదేంటని ప్రశ్నించేలోపే.. రామ్‌పటేల్‌ తన కారుతో ఆమెను ఢీకొట్టి అక్కడి నుంచి పరారయ్యాడు. అదృష్టవశాత్తు ఆమెకు ఎలాంటి ప్రమాదం జరగలేదు. శారీరక దాడితో తీవ్ర మనోవేదనకు గురైన బాధితురాలు మనీషా.. వెంటనే పేట్‌బషీరాబాద్‌ పోలీసులకు ఫిర్యాదు చేసింది. పోలీసులు సాంకేతిక ఆధారాలతో నిందితులను పట్టుకుని.. రామ్‌పటేల్‌తో పాటు అతడి స్నేహితులైన రాజ్‌ కిషోర్‌ సాహూ, దేవెందర్‌ కుమార్‌ పటేల్‌ను అరెస్ట్‌ చేసి రిమాండ్‌కు తరలించారు.
ఇలాంటి ఘటనలు సమాజంలో నానాటికీ పెరుగుతున్నాయి. ఆన్‌లైన్ మోసాలు, ఆస్తి వివాదాలు, కుటుంబ కలహాలు, హత్యలు వంటి అనేక నేరాలకు డబ్బు ప్రధాన కారణమవుతోంది. మానవ సంబంధాల విలువలు దిగజారుతున్న ఈ తరుణంలో.. ఆర్థిక లావాదేవీలలో అత్యంత అప్రమత్తంగా ఉండటం, నమ్మకస్తులైనా సరే పకడ్బందీగా వ్యవహరించడం, అనుమానాస్పద కార్యకలాపాలను వెంటనే అధికారులకు తెలియజేయడం అత్యవసరం. ధన వ్యామోహం మనుషులను ఎంతటి దారుణాలకైనా పాల్పడేలా చేస్తుందని ఈ సంఘటనలు నిరూపిస్తున్నాయి.