Are ants annoying in summer, they can be chased away from the house with just salt
ఎండాకాలంలో చీమలు చిరాకు పెడుతున్నాయా, కేవలం ఉప్పుతో ఇంటి నుంచి తరిమికొట్టొచ్చు, ఎలాగో తెలుసా?
చీమల మందు, రసాయన ప్రొడక్ట్స్ వాడితే ఇంట్లో పిల్లలు వాటిని పట్టుకునే అవకాశం ఉంది. పొరపాటున వాటిని పట్టుకుని నోట్లో పెట్టుకుంటే పిల్లలు ప్రమాదంలో పడే అవకాశం ఉంది. అందుకే చీమల్ని చంపకుండా ఇంటి నుంచి తరిమికొట్టడానికి కొన్ని సహజ చిట్కాలు ఉన్నాయి.
ఎండాకాలం మొదలైంది. రోజు రోజుకి ఉష్ణోగ్రతలు పెరిగిపోతున్నాయి. ఎండలు దంచికొడుతున్నాయి. ఎండాకాలంలో ఇంట్లో చీమల బెడద ఎక్కువగా ఉంటుంది. ఇంట్లో ఏ మూల చూసినా ఇవే కనిపిస్తాయి. బట్టల్లో దూరి చిరాకు పెడతాయి. తినే ఆహారాలపై కూడా ఎక్కువగా కనిపిస్తాయి. అంతేకాకుండా ఇవి కుడితే మంట, చిరాకు పెడతాయి. ఎండాకాలంలోని వేడిని తప్పించుకోవడానికి అవి ఇంటి మూలల్లో చేరతాయి. అందుకే వాటిని వదిలించుకోవాలి. చాలా మంది వాటిని వదిలించుకోవడానికి చీమల మందు, రసాయన ప్రొడక్ట్స్ వాడుతుంటారు.
చీమల మందు, రసాయన ప్రొడక్ట్స్ వాడితే ఇంట్లో పిల్లలు వాటిని పట్టుకునే అవకాశం ఉంది. పొరపాటున వాటిని పట్టుకుని నోట్లో పెట్టుకుంటే పిల్లలు ప్రమాదంలో పడే అవకాశం ఉంది. అందుకే చీమల్ని చంపకుండా ఇంటి నుంచి తరిమికొట్టడానికి కొన్ని సహజ చిట్కాలు ఉన్నాయి. ఈ సహజ చిట్కాలతో చీమల్ని ఇంటి నుంచి తరిమికొట్టవచ్చంటున్నారు నిపుణులు. ఆ సహజ చిట్కాలేంటో ఇక్కడ తెలుసుకుందాం.
ఉప్పు
ఇంటి నుంచి చీమల్ని తరిమికొట్టడానికి ఉప్పు ప్రభావవంతంగా పనిచేస్తుంది. అవును మీరు వింటున్నది నిజమే. ఉప్పుతో చీమల బెడదను తొలగించుకోవచ్చు. ఇందుకోసం ఒక గ్లాస్ నీరు తీసుకోండి. ఇందులో ఓ మూడు టేబుల్ స్పూన్ల ఉప్పు కలపండి. బాగా కలిపిన తర్వాత కాసేపు ఆ నీటిని మరిగించండి. ఇప్పుడు ఆ నీటిని ఇంటి మూలల్లో, చీమల పుట్టలపై చల్లండి. ఇలా చల్లితే చీమలు ఇంటి నుంచి దూరమవుతాయి. ఉప్పు రుచి, వాసన ఘాటుగా ఉండటం వల్ల వాటిని చీమలు తట్టుకోలేవు.
పుదీనా
వేసవిలో, దాదాపు ప్రతి ఇంట్లో పుదీనాను ఉపయోగిస్తారు. వేసవిలో చీమల బెడద కూడా సర్వసాధారణం. వాటిని వదిలించుకోవడానికి పుదీనా ఆకుల్ని ఉపయోగించవచ్చు. చీమలకు పుదీనా ఘాటైనా వాసన పడదు. ఆ బలమైన వాసనను తట్టుకోలేక అవి ఇంటి నుంచి మాయమవుతాయి. ఇందుకోసం పుదీనా ఆకుల్ని నీటితో మరిగించండి. ఆ తర్వాత ఈ మిశ్రమాన్ని ఒక స్ప్రే బాటిల్‌లో తీసుకుని చీమలు ఎక్కువగా ఉండే ప్రాంతాల్లో పిచికారీ చేయండి. లేదంటే పుదీనా నూనెను 10 చుక్కలను ఒక కప్పు నీటిలో కలిపి చీమలు దాగి ఉన్న ప్రదేశాలపై చల్లండి. దీన్ని రోజుకు రెండు సార్లు స్ప్రే చేయండి. దీంతో ఇంటి నుంచి చీమలు పారిపోతాయి.
దాల్చిన చెక్క
గరం మసాలాలో ఉపయోగించే దాల్చిన చెక్క మీ ఇంట్లో ఉన్న చీమలన్నీ ఒక్క నిమిషంలో మాయమయ్యేలా చేస్తుంది. దాల్చిన చెక్క యొక్క బలమైన వాసన కారణంగా చీమలు ఇంటి నుంచి వెళ్లిపోతాయి. ఇందుకోసం దాల్చిన చెక్కను బాగా పొడిలా చేసుకోండి. దీన్ని ఏదైనా నూనెతో కలిపి చీమలు ఎక్కువ ఉండే ప్రాంతాల్లో స్ప్రే చేసుకోండి. ఈ దాల్చిన చెక్క నివారణతో ఇంటి నుంచి చీమలు వెళ్లిపోతాయి. అంతేకాకుండా ఇంటి నుంచి వచ్చే దుర్వాసనల్ని తొలగించడానికి కూడా ఇది ప్రభావవంతంగా పనిచేస్తుంది.
నల్ల మిరియాలు
చీమలకు నల్ల మిరియాలు అస్సలు ఇష్టం ఉండవు. ఎందుకంటే నల్ల మిరియాల వాసన, రుచి ఘాటుగా ఉంటుంది. అందుకే నల్ల మిరియాలతో చీమల్ని వదిలించుకోవచ్చు. ఇందుకోసం నల్ల మిరియాల్ని మెత్తటి పొడిలా చేసుకోవాలి. ఆ తర్వాత నీటిలో నల్ల మిరియాల పొడిని కలిపి పిచికారీ చేయవచ్చు. చీమలు ఎక్కువగా ఉండే ప్రాంతాల్లో ఈ స్ప్రేని ఉపయోగించండి. ఇలా చేయడం వల్ల చీమలు చనిపోవు. కానీ ఇంటి నుంచి పారిపోతాయంటున్నారు నిపుణులు.
నిమ్మకాయ
నిమ్మకాయకు కూడా బలమైన వాసన ఉంటుంది. ఇది చిన్న కీటకాలను భయపెడుతుంది. చీమలు ఇంట్లోకి రాకుండా నిరోధించడానికి, ప్రతిరోజూ ఇల్లు తుడుచుకునేటప్పుడు నిమ్మరసాన్ని నేలపై చల్లుకోండి. ఆ తర్వాత నీటితో ఇల్లు తుడుచుకోండి. వంటగది స్లాబ్‌ను నిమ్మకాయ నీటితో తుడవడం ద్వారా చీమలను చక్కెర నుంచి సులభంగా దూరంగా ఉంచవచ్చు.
కర్పూరం
ఈ చిట్కా కోసం ముందుగా నీటిలో కర్పూరం వేయాలి. మీరు ఒక బకెట్ నీటిలో 4-5 కర్పూరం ముక్కల్ని వేయవచ్చు. ఇప్పుడు ఈ నీటితో ఇంటి మొత్తాన్ని తుడుచుకోండి. చీమలు నక్కి ఉన్న మూలలు లేదా తరచుగా కనబడే ప్రదేశాలను పూర్తిగా తుడుచుకోండి. వంటగది, స్టోర్ రూమ్ లేదా తలుపుల మూలల్లో బాగా క్లీన్ చేయండి. ఇలా చేయడం వల్ల కర్పూరం యొక్క ఘాటైన వాసనకు చీమలు ఇంటి నుంచి పారిపోతాయని నిపుణులు చెబుతున్నారు. దీనికి బదులు.. ఇంటి మూలలు, చీమల పుట్టల దగ్గర చిన్న కర్పూరం ముక్కలను కూడా ఉంచవచ్చు.
గమనిక
ఇది సోషల్ సమాచారం మాత్రమే. కొన్ని అధ్యయనాలు, సంబంధిత నిపుణుల ప్రకారం ఈ వివరాలు అందించాం. తెలుగు సమయం ఈ విషయాల్ని ధృవీకరించడం లేదు. ఖచ్చితత్వం, ప్రభావానికి తెలుగు సమయం బాధ్యత వహించదు.