SBI training for women.
మహిళలకు ఎస్‌బీఐ ట్రైనింగ్‌.. మొత్తం 27 అంశాల్లో శిక్షణ.. ఈ ఛాన్స్‌ మిస్‌ చేసుకోకండి!
SBI skill development program for women : ప్రభుత్వ రంగ బ్యాంకింగ్‌ దిగ్గజం స్టేట్ బ్యాంక్ ఆఫ్ ఇండియా (State Bank of India) మహిళలకు సాధికారత కల్పించే దిశగా ప్రత్యేకంగా రూపొందించిన శిక్షణా కార్యక్రమాన్ని ఆవిష్కరించింది. 153 గ్రామీణ స్వయం సమృద్ధి శిక్షణా కేంద్రాల్లో (RSET) దీన్ని ప్రారంభించింది. ఈ కార్యక్రమం ద్వారా 5,200 మందికి ప్రయోజనం చేకూరుతుందని తెలిపింది. ఈ ప్రోగ్రామ్‌లో భాగంగా టైలరింగ్, ఫుడ్‌ ప్రాసెసింగ్, వర్మికల్చర్‌, బ్యూటీ సర్వీసెస్, అగర్బత్తి/ కొవ్వొత్తుల తయారీ, తేనెటీగల పెంపకం, సాఫ్ట్ టాయ్ క్రియేషన్, జనపనార ఉత్పత్తి వంటి 27 అంశాల్లో శిక్షణ ఇవ్వనుంది.
అలాగే.. మహిళలకు ట్రైనింగ్‌తో పాటు ఆర్థికంగా సహాయం చేయడం, సొంత వెంచర్‌ ఏర్పాటు, మార్కెట్ లింకేజీలను ఏర్పాటు చేయడంపై మార్గదర్శకత్వ సలహాలు కూడా అందిస్తుంది. శిక్షణ పొందే మహిళల్లో ఉత్సాహం నింపేలా స్థానిక ప్రముఖులు, విజయవంతమైన వ్యవస్థాపకులు వారి అనుభవాలను తెలిపే అవకాశం కూడా ఉంటుంది. దేశంలోనే అతి పెద్ద ప్రభుత్వ రంగ బ్యాంకు అయిన స్టేట్ బ్యాంక్ ఆఫ్ ఇండియా (ఎస్‌బీఐ).. మహిళా పారిశ్రామికవేత్తలను ప్రోత్సహించడం, మహిళలకు స్వయం ఉపాధి దిశగా ప్రోత్సహించడం కోసమే ఈ ప్రత్యేకంగా సరికొత్త ప్రోగ్రామ్‌ ప్రవేశపెట్టింది. వ్యాపార రంగంలో కొత్త ఆవిష్కరణలు చేయాలని ఆశపడే మహిళల కోసం ఇది అత్యంత ప్రయోజనకరమైన ప్రోగ్రామ్‌ అని చెప్పుకోవచ్చు.
మహిళా సాధికారతకు ఎస్‌బీఐ కృషి
దేశవ్యాప్తంగా స్వయం ఉపాధిని ప్రోత్సహించడంలో ఎస్‌బీఐ కృషి చేస్తోంది. ప్రారంభం నుంచి ఈ కేంద్రాలు దాదాపు 46,818 శిక్షణా కార్యక్రమాల ద్వారా సుమారు 12.74 లక్షల మంది అభ్యర్థులకు శిక్షణ ఇచ్చాయి. వీరిలో 74% మంది అభ్యర్థులు స్వయం ఉపాధిని సాధించారు. దేశ జీడీపీకి మహిళలు దాదాపు 18 శాతం సహకారం అందిస్తున్న నేపథ్యంలో మహిళా సాధికారతను మరింత పెంచాల్సిన అవసరం ఉంది.
మన దేశంలోని మహిళలకు స్టేట్ బ్యాంక్ ఆఫ్ ఇండియా తోడ్పాటు అందిస్తోంది. స్వయం- సహాయక సమూహాల మహిళలకు అందించిన రుణాల్లో రూ.50వేల కోట్లకు పైగా సహాయంతో ఎస్‌బీఐ ముందంజలో ఉంది. ఆయా స్వయం- సహాయక సమూహాల్లోని సుమారు కోటి మంది మహిళల జీవితాలలో మార్పు తీసుకురావడంలో కృషి చేసింది. ఎస్‌బీఐ ద్వారా అందిస్తున్న సామాజిక భద్రతా పథకాలలో మహిళల భాగస్వామ్యం 50 శాతం కంటే ఎక్కువగా ఉంది. ఇక కార్పొరేట్‌ సామాజిక బాధ్యత కింద బ్యాంకు చేపడుతన్న కార్యక్రమాల్లో మహిళా సాధికారత కీలకమైన అంశంగా మారింది.